Martin Gehrer: gesprochen

Thomas Locher gesungen (Melodie: Kiosk von Polo Hofer)

Grönland

Martin

De Trump gseht z’Grönland uf em Iis ein, wo er nöd kennt.

Vorsichtshalber frogt er denn: «Isch da de Präsident?»

En Eskimo langt sich an Grind: «Da chasch voll vergesse.

Da isch dengg en Iisbär döt, wör di zum Zmorge fresse!

Doch nochher hett er denn Problem wiä du mit Epstein-Fraue.

Denn nöd emol en Iisbär cha z‘viel Gammelfleisch verdaue.»

Thomas

A sin’re Stell‘, ganz ehrlich gseit, hett i als Donald Schiss,

denn z’Grönland isch es gföhrlicher als z’Minneapolis.

Da isch doch alles ungerecht, me cha da nüme toppe:

D’Iisbäre zahled jetzt en Zoll för jedi gfressni Robbe.

Wär de Trump doch nu e Robbe, und da för s’ Protokoll:

Denn zahled mer zwei Lästerzunge no gern de Robbe-Zoll.

Fliege Erika

Martin

Zeh Johr hät d’Flüüge Erika, a de Uni hundsgemein,

e wörklich übels Do-Sii gefristet, im Bode, ime Schrein.

D’HSG, diä hät jetzt gnueg, wött sie i d’Freiheit loh.

Doch d’Erika, diä macht Problem, flügt eifach nöd devo.

Vermuetlich muesch Professor si, wär’s anderst, wör i lüüge,

um z’begriife, diä isch tot und cha jo nüme flüüge.

Thomas

Wär d’Erika statt nu e Flüüge, e Ente und au tot,

denn wösst i no en Prominente, dä nähmt sie scho zur Not.

Us Federe vo tote Tier macht dä 1A-Duvets

Sin Name isch Bettware Fischer vo Au am Zürisee!

SRG halbieren

Martin

S’Schwizer Fernseh wönds halbiere. Da bruucht ziemlich Muet.

Denn da, wa hüt im Fernseh chonnt, isch eh nu halbe guet.

Und striichsch vo dem no föfzg Prozent, d’Problem han i scho satt:

Us zeh vor zeh wird föf vor föf – Peach Weber halb so glatt.

De Fritsche-Bauer-ledig-Typ suecht nu en halbe Schatz.

Deför verfüehrt de Sascha Ruefer no en halb so grosse Latz.

Doch s’Allerschlimmst, da mue me gseh, wär a dem Modell:

De Odermatt am Lauberhorn fahrt nu no halb so schnell.

Thomas

De SRG wönd’s d’Chöle neh. Jetzt chönd’s denn nüt meh bringe.

Kein Tschugger, kein Bestatter meh. Wa söll i jetzt no singe?

I weiss nöd recht, es git nöd viel. I gspüer e grossi Leeri.

Doch s‘Schlimmst för mi als Lehrer wär, sie halbiered mini Feeri.

Voliere

Martin

De Stadtrot Buschor, dä hät’s streng, weg dere Voliere.

Will im Stadtpark d’Vögel fehled, muess er d’Chäfig leere.

D’Maria Pappa seit dezue: «De Buschor isch en Nette.

I gang i d’Wiborada Klause för min Kolleg go bete.»

I find’s no guet, da schadet nüt, doch s’Vogelhuus bliebt leer.

Debi wär’s zum paar Vögel z’finde, z’Sangalle nöd so schwer.

Gang is Rothuus, lueg di ume und bis e bitzli nett,

denn findsch im Stadtrot meh als eine, wo e chli en Vogel hät.

Thomas

Chomm, Lästerzunge, riiss di zemä, söttig Vers sind spitz.

Da ghört sich nöd, me macht doch nöd öber d‘Stadtröt Witz.

Doch bim Markus Buschor häsch zu Recht en freche Latz;

bi dem hät‘s zwösched Hirn und Huet guet för en Vogel Platz.

Wonnenstein

Martin

D’Scholastica vo Wonnestei, diä tuet mer furchtbar leid.

Jetzt hät me doch diä Chlosterfrau zum Chloster use gheit.

Sie hät jo nu de Gsundheit z’liäb vom Bischof, min Respekt,

mit Chlosterfrau-Melissengeist sin Messwy bitzli gstreckt.

Hät sie de Wy echt selber gsoffe? Da wär e schweri Sünd.

Sie isch uf all Fäll obdachlos, egal us welne Gründ.

De Papst, de Bischof sind schockiert. D’Scholastica stiigt drom,

damit sie mol in Himmel chonnt, uf Wywasser om.

Thomas

Mit dere gohsch chli hart is Gricht. Diä gspüert en choge Druck.

Du nimmsch jo selber ab und zue au gern emol en Schluck.

Häsch du mer nöd grad letschti gseit, – guet, da cha me rauche –

du gängsch ganz gern in Bodesee ab und zue go tauche.

I weiss jetzt au, worom da machsch. För da muess i nöd google.

Du häsch doch döt de Gin versteckt i dere grosse Chugle.

2Lästerzungen 2026

Mein Name ist Hase

Martin

Es isch truurig, aber wohr und trotzdem schwer z’verstoh:

Jetzt hend diä cheibe Basler no d’Helvetia öberno.

Wär de Standort z‘Zöri gsi, denn wär da nöd passiert;

En Basler hett ganz sicher niä en Zörcher annektiert.

De Stadtrot weiss vo allem nüt, sind still wiä föf Eunuche.

Debi chönnt d’Stadt d’Helvetia för d’Stüüre meh als bruuche.

För tüürs Geld chauft jetzt d’Bâloise diä stolz Helvetia.

Hetted’s doch de Stadtrot kauft, dä chönnteds günstig ha.

Thomas

Bisch Basler, Urner, Genfer, isch’s wichtig, dass erkennsch,

dass trotz de grosse Schnöre au en Zörcher isch en Mensch.

Mer alli ghöred zu de Schwiz, mer wönd do dröber wache.

Me chönnt jo viellicht bi de Zörcher emol e Usnahm mache.

Olympia

Martin

Olympia isch voll im Gang, de Simi flüügt nöd mit.

Er seglet halt i letschter Zyt scho nüme allzu wiit.

Mit Ovo chönnt er’s sicher länger, aber unterdesse,

mag nöd emol de Simon Ammann so viel Ovo fresse.

Thomas

De Chef vo Ovo, dä schiisst’s aa, er find’t da echt en Schrott,

denn wenn de Simi nüme flüügt, goht Ovo bald Bankrott.

Drom suecht er chrampfhaft noch Ersatz, da goht ehm uf de Wecker.

Zum Glück git’s eine i de Schwiz, de Hausi Leutenegger:

Olympiasieger, Millionär, sit sechzg Johr OLMA-Gänger.

Dä cha’s nöd besser als de Simi, aber dütlich länger.

L’État c’est moi

Martin

De Louis Quatorze hät da scho gseit und sich selber krönt.

Drom sind mer üs jo Sonnekönig und so Type gwöhnt.

De Infantino vo de FIFA, da isch scho ziemlich fies,

dä schiäbt am Trump is Füdli ine de FIFA-Friedenspriis.

Zum Schluss chrüücht er no selber ine, döt passt er au guet dri.

Diä hend doch öppis mitenand, do chasch fast sicher sii.

Thomas

De Gianni gliicht am Meister Proper, ufs Hoor, da isch frappant

3Lästerzungen 2026

Dass «proper» suber heisst uf dütsch, isch ehm und mer bekannt.

De Infantino cha französisch, er isch polyglott,

kennt jede Promi, jede Scheich und fühlt sich wiä en Gott.

Er git sich zwor als Saubermann, doch suber isch er nöd.

Woher i’s weiss? I bi doch Lehrer, und nöd wiä dä so blöd. (zeigt auf Martin)

Tschüss

Martin Thomas

En Gauner do, en Gfangne dei De Maduro wär gern wieder frei.

Kein Chefarzt do, kein Chefarzt dei Gschpüri hät de VR kei.

En Grabscher do, en Töpler dei De Andrew fühlt sich vogelfrei.

PFAS do und PFAS dei Läck, git da e huere Gschrei.

En Impfpflicht do und Wil West dei d’SVP seit zweimol nei.

E Sprüchli do, e Versli dei d’Lästerzunge gönd jetzt hei.

Zugaben

Louvre

Martin

En Grossalarm mit Polizei und öberall Kontrolle.

Im Louvre hend vier Panzerknacker paar Kronjuwele gstohle.

S’isch glaub vom Trump en Uftrag gsi. Er bruucht sie för e Krone,

wenn er als König spöter mol im Ballsaal sötti wohne.

För d’Lieferig schenkt er de Räuber uf dere Hehlerei

nebst em Zoll no zeh Chlorhüehner. I glaub, i leg en Ei.

Thomas

Viellicht häsch Recht, da chönnt scho si. Er hät de Uftrag geh

und de Uftrags-Räuber gseit, sie sölled alles neh.

Er nimmt jo gern, wa ehm nöd ghört. Hauptsach, de Rubel rollt.

Bim Zoll-Deal isch‘s e Rolex gsi, dezue en Barre Gold.

Bim Louvre hät er’s anderst gmacht: Er zahlt de Räuber Chole.

Nu Grönland wör er allzu gern ohni Chole hole.

Fussball

Thomas

Noch de Fraue- stoht im Sommer d’Manne-WM aa.

Wer d’WM gwönnt, isch jetzt scho klar: Es isch dengg d’USA.

Nöd Portugal, nöd Spanie. De Case isch echt de Wörst.

Doch de Trump seit’s jo scho lang: Amerika isch först.

Und d’ICE helft wacker mit, es isch mir echt en Gruus:

Diä wiised fremdi Fuessballspieler eifach vorher uus.

4Lästerzungen 2026

Blackout

Martin

Ganz Berlin isch ohni Strom, Dütschland seit «guet Nacht!»,

während de Kreml schadefroh sich is Füüstli lacht.

De Merz wött schnell Ersatzstrom ha und denkt a s’Wiisse Huus.

Döt hockt doch so eine Oberlüüchte, diä hät jo eh z’viel Pfuus.

Thomas (mit amerikanischem Slang)

De Narzist im Oval Office schriibt ehm zrogg: «Oh, Honey,

Energy, I have enough, but only gegen Money.

Lampen, we have keine mehr. Sorry, what I you tell.

Die Leuchten sind im Weissen House leider nicht so hell.»

Martin Gehrer: gesprochen

Thomas Locher: gesungen (Melodie: Kiosk von Polo Hofer)

In eigener Sache

Martin

Vor föf Johr hät min Junge gseit: «Chomm, Vater, ehrlich, lueg:

I ha scho viel z’lang glästeret, jetzt han i langsam gnueg.»

Sit denn han i en Neue gsuecht, verbisse bis ufs Bluet.

Und gfunde han i ehrlich gseit, ein, wo’s zur Not grad tuet.

Erwarte dörf me nöd so viel, er isch jo au en Lehrer.

Doch singe chan er, immerhin. De Rest, da macht de Gehrer.

Thomas

Jetzt speuzisch aber grossi Tön. Debi wärsch gschieder froh,

dass eine chonnt, wo singe cha. Da hebt scho mol s’Niveau!

Doch ehrlich gseit: I cha’s verstoh, du bisch halt eifach niedisch,

dass nöd so jung und nöd so gschied und nöd so schö wiän i bisch.

Martin

I ha’s eu gseit: en Lehrer –

Am Morgen hät er Recht und am Nomittag frei.

Ciao Viola

Martin

D’Viola goht, sie isch frustriet und seit üs drom jetzt schau.

De Blocher wör gern wieder cho, de Ueli Murer au.

Wer’s sus no chönnt, seit fründlich ab, d’Uswahl isch drom schitter.

Eine bliebt, wo englisch cha, der Gefreite Ritter.

d’Frau Keller-Sutter öbersetzt, und sie freut sich echt.

Scho bald hät sie i ehrem Stall föf Buure und en Chnecht.

Thomas

De Daniel Jositsch isch frustiert. I cha da verstoh.

Statt ehm hend’s i de Bundesrot d‘Beaume-Schneider ine gno.

Doch damol weiss de Herr Professor und do bliebt er stuur:

Im nächste Läbe wird de Jositsch besser Frau und Buur.

Kathi Wil

Martin

Z’Wil, do tönd mer d’Buebe leid, wa mi e chli geniert.

Sie dörfed nöd i s’Kathi go, sie werded schikaniert.

Diä Meitli döt, diä sind so bös und hend diä Buebe gmobbt.

Zum Glück hät z’Lausanne s’Bundesgricht diä Schikane gstoppt.

För d’Buebe isch’s e grosses Glück, sie mönd sich nüme gruuse

und chönd jetzt i de gmischte Schuel mit de Meitli schmuse.

Thomas

Diä Grüene findet da no guet und insgesamt famos,

denn d’Bildig müessi weltlich si und erst no kostelos.

Ehr hend jo Recht, s’mue gratis si, doch mer schiint’s halt ebe:

Bi eu isch d’Bildig nöd nu gratis, sondern au vergebe.

ESC

Martin

De ESC söll z’Basel si, und Zöri luegt i d’Röhre,

d’Olma und Sanggalle au, doch da sött niemert störe,

denn d’Qualität vom Personal – mer hetted üs blamiert:

D’Sonja Lüthi und de Buschor hetted moderiert.

Thomas

Kein ESC, CSIO, kei Gsang und au kei Rössel,

D’Christine Bolt isch schwer enttüüscht und au d’Nayla Stössel.

Sangalle isch halt nöd modern, da chasch als Usred bringe:

Au de Gallus hät nöd chönne ritte oder singe.

Grönland

Martin

De Donald Trump, en Putinfründ, dä schriibt jetzt no uf Twitter:

Er kaufi Grönland, Panama und so gäng da witer.

De Kanton Basel nimmt Notiz und zeigt Intresse aa.

Er chönni doch, wa wötsch no meh, Zöri gratis ha.

Thomas

De Donald Trump, de Elon Musk, diä Super-Egomane,

sind nebebi im Grössewahn d’Weltherrschaft am plane.

Beidi händ en Egge ab, mer lönd kei Träne flüüsse;

me chönnt sie samt de Födlebürger uf de Mars ue schüsse.

Kopfschuss

Martin

Z’Amerika, bim Attentat, schüsst ein am Hirn vorbi.

Eine, wo de Grind nöd trefft, da mue en Bündner si.

Schüsst döt en Jäger, bisch scho froh und chasch nu no hoffe,

er heg bim Wolf, nöd wiä bim Trump, nu de „Löffel“ troffe.

Thomas

De Jesus frogt am Chrüz: «Liäbgott: Worom häsch mi verloh?»

Susch überall häsch d’Hend im Spiel. Wer söll da no verstoh?

Em Maradona, Fussballgott, dem helfsch mit Gottes Hand.

Und au am Trump, bim Attentat, dem rettisch sin Verstand.

De Liäbgott seit: «Reg di nöd uf, bim Donald Trump chasch wette,

wenn’s um sin Verstand wör goh, git’s nüme viel zum rette.»

Traumpaar

Martin

D’Helene Fischer, Silbereisen, diä hend jetzt wieder Friede.

D’Angelina und de Brad, diä sind jetzt aber gschiede.

De Egger Mike, im Parlament, dä hät da scho chli gschluucht,

bis er jetzt d’Lisa gfunde hät in «Metzger ledig sucht».

Thomas

D’Frau Vincenz hät de Tochter gseit: «Momoll, dä chasch scho neh.

Es chönnt jo no viel schlimmer si als vo de SVP.»

De Opa hät da anders gseh. Denn er befüerchted scho,

a s’Hochzyt denn i eis, zwei Johr chönnt au de Blocher cho.

Fankultur

Martin

D’Uefa büesst de FC hart, de Hüppi hät de Blues,

denn gwössi Fans benehmed sich grad wiä im Affehuus.

Wan i öber da so denk, do langt en chline Satz:

«Zöglet us em Kybunpark, im Walter Zoo hät’s Platz.»

Thomas

Pyro isch wiä (luuts) Füürwerk, es qualmt und stinkt brutal,

und nu am nationale Fiirtig isch Füürwerk ganz legal.

De Hüppi nervt sich ab de Buess und us luter Frust

leit er all Sangaller Spiel uf de 1. August.

CS-Debakel

Martin

D’CS liit wiä sinerzyt d’Swissair ganz am Bode.

Keine wör meh öppis geh, keine wött sich rode.

D’Frau Keller-Sutter hät d’Idee, wobi, de Groot isch schmal.

Sie seit am Sergio: «Guete Ma, es bliebt mir gar kei Wahl.

d’UBS muess d’CS neh, au wenn’s nöd allne passt.

De Ander, wo’s no gern wör neh, de Vincenz, hockt im Knast.»

Thomas

Es git e PUK, diä prüeft und tuet und konsultiert s’Orakel

und seit, de Ueli Murer seg au z’schold a dem Debakel.

De Unterschied vo UBS zom Ueli isch frappant:

D’UBS isch immerhin systemrelevant.

De Bundesrot und d’Finma hend, wil diä Bank so serblet,

bi Nacht und Nebel d’Credit Suisse a d’UBS verscherblet.

Em Management, dem isch’s egal, wer wer öbernimmt,

d’Hauptsach isch, isch keine z’schold und de Bonus stimmt.

Alles fahrt Ski

Martin

Zermatt hät wölle Renne ha und denn hät’s gstürmt und gschneit.

Sangalle springt zum Glück jetzt ii, d’Frau Pappa hät da gseit.

Zwor hemmer nu de kürzest Lift, deför – nöd erst ab morn –

sind üsi Stüüre i de Stadt so höch wiä s’Matterhorn.

Thomas

De Odermatt isch fasziniert, d‘Östricher chömed au.

Zwanzg Meter isch diä Piste lang, am Skilift git’s en Stau.

D’Groschli findet’s ideal, en steile, kurze Hang,

so isch de Rückstand uf üs Schwizer för eimol nöd so lang.

Appizöll

Thomas (Appezeller Dialekt)

De Fässlers Seff vo Appizöll, dä hät’s sus feieli guet,

doch wa’s z’Sangalle onne tönd, da lopft em Seff de Huet.

Diä dritte Röhre goht bachab, z’schold för ehn sind d’Fraue,

deför wönd’s wege z’viel Verkehr mit Pförtner d‘Auto staue.

Luut Fässler bringt da libarement nüüz, er find‘s e Furzidee:

«Me het de Wyber gschieder niä da Frauestimmrecht geh.»

Gueti Besserig

Martin

De Franziskus z’Rom isch chrank, er huestet, küücht und bangt.

Alli betet för de Papst und hoffed, dass da langt.

«Trinke muesch, so viel nu goht», hend ehm d’Ärzt verzellt.

Jetzt hät er us em Petersdom e Fass Wywasser bstellt.

Thomas

De Bischof Markus frogt de Papst: «Dörf i no chli bliebe?»

«Nei», seit dä, «es isch jetzt Zyt. Du chrampfsch jo eh för siebe.»

Sis Vorbild chönnt de Biden si. Dä isch au viel z’früeh gange

und wiä bim Joe wird’s för e Frau als Bischöfin kum lange.

Wirbelsturm

Martin

De Lothar isch e Usnam gsi, hät blosed weisch wiä gstört.

Sus hend diä Stürm nu Fraue Näme. I find da unerhört.

D’WHO, diä hät jetzt gseit: «Diä Näme, diä sind domm.

Mer taufed jetzt diä Hurricans i Manne-Näme om.»

Meistens sind’s jo Schlammlawine, dreckig, bru, e Gschmier.

Dä nächst heisst jetzt, i find’s no guet, Putin Vladimir.

Thomas

Leider git’s jo all meh Stürm, und weisch wiä hend diä Pfuus.

Mer mönd drom doch no Fraue neh, sus gönd üs d’Näme uus.

Alice Weidel chämti doch för brune Schlamm grad recht,

im Bündnis mit de Putinfründin Sahra Wagenknecht.

Kunst am Bau

Martin

Sangalle wött en Marktplatz baue und e Bibliothek.

D’SVP, diä isch dägege. Da isch e Hypothek.

Diä Beamti seged fuul, drom sind’s uf de Verwaltig.

Eine luegt zom Fenster uus, i ziemlich grader Haltig.

En Bürger seit vom Trottoir uus: «Jetzt lueg i ganz genau.

Bewegt er sich drü Stunde nöd, denn isch es Kunst am Bau.»

Thomas

D’SVP, diä froget sich: «För wa e Bibliothek?

Alles Wösse, wo me brucht, da lernt me i de Sek.»

Stimmt genau, I gseh s’Problem. I fress do glatt en Bese:

E Bibliothek nützt nume öppis, wenn me au cha lese.

Legenden

Martin

Lindsey Vonn, Podladtchikov, diä hend en riise Druck

Und chömed drom noch vier, föf Johr uf d’Pischte wieder zrugg.

De Simon Ammann seit sich drom: «Im Alter cha’s no lange.»

Er hät jo Recht, debi, obwohl – er isch no gar nöd gange.

Thomas

Er flüügt und flüügt, doch sin Erfolg, dä isch meh schlecht als recht.

D’Erklärig chönnt jo Flugangst si, drom sind d’Ergebnis schlecht.

Gicht, Arthrose, Knocheschwund: Im Alter wird alles stränger.

Gottseidank: Mit Ovo chasch’s nöd besser, aber länger.

Tschüss

Martin und Thomas (abwechselnd)

E Windrad do, e Windrad dai. Windrädli wött Sangalle kei.

En Markplatz do, en Marpklatz dei. Sangalle seit zum Marktplatz nei.

Kein Tunnel do, kei Röhre dei. z’Sangalle git‘s e huere Gschrei.

Kei Badi do, kei Hütte dei. Rorschach macht en suure Stei.

En Iibruch do, e Brüchli dei. De Hassan hät jetzt wieder frei.

E Sprüchli do, e Versli dei. D’Lästerzunge gönd jetzt hei!

In eigener Sache

Fast driissg Johr mach i mit dem Tröli

a jedre Fasnacht do de Löli.

I versle, brünzle, dichte, tue

und min Kolleg tuet nüt dezue.

Z’erst de Dick und jetzt de Spiesse –

uf da chan i jetzt langsam schie… verzichte.

Mit some Löli hörsch uuf dichte.

Lästerspruch

Jo, isch au Zyt, dass dä jetzt goht.

S’isch eigetlich scho zwanzg Johr z’spot.

Denn simmer ehrlich, d’Lästerzunge

sind nu so guet weg mer, am Junge!

Sesselkleber

Sangalle stöhnt: «Oh jemine!

De Scheitlin wött bald Abschied neh.»

Theresa goht und d’Merkel bald.

Au i werd’ för de Schiessdreck z’alt.

Nu eine git’s, wo gar niä goht:

De Päuli, dä bliebt Ständerot.

Hugh Hefner +

Da macht en Playboy voll kaputt:

Niä e Decki, all nu blutt.

Jetzt isch er tot, cha nüt meh gspüre;

jo ohni Decki muesch verfrüre.

Debi wär dä no voll agil.

Mit Bettware Fischer, Wädiswil.

# me too

De Toni Brunner hät de Rappel

weg sine Wyber z’Ebnat-Kappel.

Im Stall fangt’s aa: z’erst meised d’Tina,

denn d’Bella, d’Nora, d’Mona, d’Nina:

Und jedi schreit: «Dä triebt’s uf d’Spitze.

Er langt bim Melche all a d’Zitze.»

Verkehrte Welt

De Trump hört uuf als Präsident und goht zur Firma Twitter.

De Putin seit am Kreml tschau und wird sin Babysitter.

Und au de Papst hät gnueg vo Rom und führt jetzt neu e Beiz.

Do passt’s jo no ganz guet is Bild: d’Martullo wird Miss Schweiz!

Mexico

D’Chinese hend ganz wild entschlosse

de Donald Trump is Weltall gschosse.

Dä rüeft vom Mo uus schadefroh:

«Döt one liit jo Mexico.

Da hett i mer nöd z’hoffe traut:

Mini Muur isch jo scho baut.»

De Astronaut frogt: «Häsch Angina?

Diä Muur, wo du gsehsch, diä stoht z’China.»

Lästervers

De Trump zum Murer: «How are you?»

«I am the Ueli und wer bisch du?»

«Hi Ueli, fine, du bisch min Ma.

För d’Muur sött i no Murer ha.»

atemlos

d’Manne hend fast Herzinfarkt:

d’Helene isch jetzt uf em Markt.

De Klöti gseht da eher kesser:

Ehm gfallt de Silbereisen besser!

Reliquien

De Bischof seit am Gehrer gschwolle:

«Chomm, gang uf Prag, go d’Chnöche hole.

De Schädel liit döt tuusig Johr

und du gliichsch dem döt fast ufs Hoor.»

De Zöllner seit am Zoll galant:

«Döre loh, diä sind verwandt.»

Genferei

De Maudet isch i d’Ostschwiz cho

und bliebt am Bahnhof länger stoh.

«Isch habe ganz zu meiner Schande             (frz. Dialekt)

diä binär Ühr nischt ganz verstande.»

Do chasch nu säge: «Pierre, c’est dur.

Dü missverstehst nischt nür die Ühr.»

Ranking

Fluecht d’FDP und Petra Gössi,

lacht sich de Maudet eis is Chössi.

Und wötsch e Spese-Ranking gseh,

denn schloot ehn nu no d’HSG.

Handy

Chonnsch vom WC, bisch nervös,

häsch nassi Füess und nassi Stöss.

Denn weiss i grad, wa da bedütet:

Bim schiffe hät dis Handy glütet.

Hockt de Maduro us Versäh

füdliblutt uf’s iPhone 10.

Denn hät sis Display angstverzerrt

weg some «Gsicht» de Code entsperrt.

Blödelvers

Es stinkt der See, die Luft ist rein.

Maduro muss ertrunken sein.

Und d’Wetterschmöcker gind zum Gruess:

«E chli stinke muess’ (es).»

Dornrösli

De Junker chonnt als Prinz, muesch wüsse,

uf Bern go Karin Keller küsse.

Vor Liäbi blind chonnt er i d’Sätz

und küsst bigoscht denn voll diä Lätz –

Er gspüert bim Küsse ei Gestocher:

Hoor uf de Zäh – d’Martullo-Blocher.

            Wär’s de Constantin, hetsch nüt meh z’lache.

Dä het am Junker eini bache!

Tschüss & Tschau

Da isch es gsi, noch zwanzg Johr und meh

hend’s d’Lästerzunge langsam gseh.

Drom isch da de letschti Vers.

Danke, schö gsi, tschüss. Da wär’s!

# MeToo

Gsehsch super us, bisch attraktiv,

wohnsch z’Hollywood, bisch jung, naiv.

Häsch Angst, s‘chönnt ein a s’Füdli lange,

denn isch’s dir wiä bim FC gange.

Wobi döt nöd viel besser fahrsch:

Statt Sex git’s döt en Schueh-in-Arsch.

Lästerregel à la FC Sion

Schreit de Trainer: «Jemineh,

mir tuet’s am Füdli huere weh»

und hüpft no wiä es Känguruh,

denn rüeft de Fringer Rolf: «Me too.»

Business Plan

De Silvio söll schiint’s wieder cho

us sim Bunga-Bungalow.

Dä und de Trump und als Scharnier

us Moskau no de Vladimir,

und denn no bitzli Erdowan –

scho hetsch en super Business-Plan

för de absolute Grössewahn.

Lästervers

S’erinneret a Buurehöf mit luter Alpha-Tier.

Irgendwenn chonnt jede dra: De Buur kastriert de Stier.

Jetzt wössed mer’s, es wird üs klar, mer hend’s au voll kapiert,

worom’s halt so viel Ochse git, wo jede gern regiert.

Gülle

Bim Markus Ritter, ehrlich, echt,

schafft im Stall en Türk als Chnecht.

Dä versteckt sin Gülle-Wage,

denn de Erdowan täg Gülen jage.

Naturmuseum

Als Muetter schloht’s dir uf de Mage:

„Kein Iitritt mit em Chinderwage.“

Jetzt gönd diä Müetter halt i d’Chile,

ohni Stress go d’Baby stille.

De Pfarrer freut’s, er isch nöd stur,

so gseht er au mol bitz Natur.

Abrüstung

De Putin luegt z’Amerika de Misses Trump uf d’Bluse

und entdeckt döt guet verpackt en ziemlich grosse Buse.

Er witteret e Terror-Gfohr und rüeft am KGB:

«Diä treit zwei Bombe uf de Brust, da chönnt en Aaschlag geh.»“

De Donald seit zum Vladimir: «Chomm, mach doch kei Komedi:

I ha im Fall en Waffeschy för mini Frau, d’First Lady.

Du muesch kei Angst ha, Vladimir, nu bitzli meh studiere:

Sit wenn cha Botox, guet verpackt, im Blüsli explodiere?»

Hungersnot

Z’Nordkorea sind’s arm dra,

sie sölled nüt meh z’esse ha.

Gsehsch denn de Kim, so jung und frisch,

denn weisch, wo s’Esse ane isch.

No Billag

D’Landfraue-Chuchi isch doch s’Gröschti.

De Albert choched döt e Rösti,

för d’Leuthard no e Suppe-Iilag

und diä schlüerft sie ohni Biilag.

und seit am Rösti bi de Tür:

«E so e Biilag isch mer z’tüür.»

Stadtrot

Wötsch z’Sangalle Stadtrot si,

denn langt e Frau, scho bisch debi.

Anderscht isch’s z’Amerika,

Denn döt muesch s’gröschti Hirni ha.

S’ stimmt au bim Trump, da isch kein Chohl.

Nu isch bi ehm säb Hirni hohl.

Coiffeur

D’Fussball-Nati hät Figure

und dene stönd denn diä Frisure.

Mit Gel uf d’Brusthoor wönd’s jetzt bschiisse,

denn chöned d’Liibli nüme riisse.

Tweet von Trump (in amerikanischem Slang)

# Geg Brazil mönd ihr henä muure,

take my Gel för diä Frisure.

Unfortunately I have chli Stress:

S’Patent, da ghört am Gilbert Gress.

Bergbahnen

«Im Vergliich zum Esel», seit de Buur,

«sind mer im Fall denn gar nöd stur.»

Doch im Toggeburg git’s schiinbar Lüt,

do unterscheidet sich vom Esel nüt.

Waidmannsheil

Wenn ein uf d’Jagd im Thurgau goht

und s’Schof umgheit und d’Wildsau stoht,

denn seit de Vincenz wild entschlosse:

«So Böck han i scho mengi gschosse.»

Lästerzungen second

Dear Mister President, welcome to our updated introduction message about Lästerzungen, the sexiest snitzelbank in Saint Gallen. Like you, we have a very big mouth. And we love Melania and she loves lästerzungen. We have the best jokes. They are like your tweets: No Niveau. We also have many followers. At Saint Gallen Fasnacht they listen to every bullshit we tell them – and they like it. Maybe they are a little bit like your followers. We also love your tax reform. This old guy next to me tried the same thing as president of “Saint Galler Regierung”. But he failed. Like a Mexican. Total disaster. That’s why it’s going to be «Donald first»“. But can we just say «Lästerzungen second»?

Let us do this our way.

In Switzerland we will than say:

It’s done and once more simply ”glunge“:

The highlights from the Lästerzunge!

2017

Hohe Löhne

Luut Tagblatt hät, jo Gopfriedstutz,

de Scheitlin scho en choge Stutz.

Scho klar, dä isch im Rentenalter

und stoht guet föfzeh Stond am Schalter.

Am Schalter obe hät’s e Feld:

«Familieplanig – Chindergeld.»

Als erste Kund chonnt d’CVP,

gnauer gseit de Darbelley.

Lästerregel

De Darbelley, dä froget aa,

ob er diä Sünd go biichte cha.

De Bischof hät nu d’Ohre gwagglet:

«Mer hend’s de Biichtstuehl abe gfagglegt.»

Tierli Walter

En Elefant hend’s döt jetzt kauft

und weisch wiä wird de Jumbo tauft?

Jo klar: «Prinz Charles» – i find da nett –,

will dä so grossi Ohre hät.

            D’Camilla murmlet vor sich hi:

«Weg em grosse Rüssel cha’s nöd si.»

Lästervers

Und hend’s au no en Hornochs kauft,

wird dä Martullo-Blocher tauft.

Burka

E Burka, ehrlich, tuet mer leid,

wär eigetlich e super Kleid.

Stülpsch eifach dröber, s’wär de Wahn

för de Köppel und de Erdogan.

No besser wär’s för diä zwei Drache,

me chönnt de Sack no schalldicht mache!

Lästerregel

Häsch Runzle, Furche, Narbe, Falte

und gfallsch drom nüme so dim Alte,

denn bruchsch kei Botox, muesch nöd zügle,

denn treisch e Burka, diä chasch bügle.

Burnout

En Burnout häsch, vereifacht gseit,

wenn d’Decki uf de Öpfel gheit.

Wenn da mol gspüersch, söttsch zum Vergesse,

i s’Fac go s’Menü Surprise esse.

Zum Dessert git’s als Happy-End

e Stube-Decki uf de Grend.

America first

Hät ein e Hoorfarb wiä s’Kamel

und bruucht zum Strähle ziemlich Gel,

denn schlüss i drus – do seichsch i s’Nest –,

vom Kamel stammt au de Rest.

Hohes Gericht

Suecht de Trump uf langi Sicht

en Richter för sis höchste Gricht,

denn git de Götte ehm de Rot:

«Frog d’SVP, diä weiss, wiä’s goht.»

Seit denn de Trump zum Götte: «Mikel,

meine Frage is chli heikel.

Have you for mi in Switzerland,

any Richter second hand?»

«Yes, we have», seit denn de Gimpel,

«very old and very simple.

His name is Güntzel, üse Ma,

grad arbeitslos und wieder z’ha.»

Lästervers

De Güntzel hät us Bürgerpflicht,

d’Weiche gstellt för s’Obergricht.

Mer mached do e Frogezeiche:

Sit wenn hät s’Abstellgleis e Weiche?

Regierung

Vo Abtwil kennsch de Tschirky Boris

vom Bundesrot kennsch d’Leuthard Doris

vo de Regierig kennsch, chomm, säg mer eine;

–    mir gohts gliich, i kenn au keine.

Lästerzungen second

Dear Mr. President, welcome to this introduction message about Lästerzungen. The sexiest snitzelbang in Sankt Gallen. Look at this old man next to me, this old funny man. We are the best comedians. In our jokes we also love to treat our women badly, for example our former First Lady, Misses Eveline Widmer-Schlumpf. And she lets us do it. So great. We are tough guys. And we are native Swiss, real Sankt Gallen people, no Mexicans, neither him nor me. We have the best Födleburgers. Nobody knows them, but we have them. And they are all white. Lästerzungen are very smart. Our jokes are so trump. Listen Donald. We totally understand it’s going to be «Donald first». But can we just say «Lästerzungen second»? So great. Lästerzungen: Twelve Points.

Schlussfazit

Und da sinds‘ gsi, wiä immer glunge

d’Highlights vo de Lästerzunge.

2016

Kleinstes Übel

Kein Brand, kein Aeschi und kein Gobbi;

jetzt hend mer halt en andre Globi.

Nebed sechs so super Gschiede

mag’s doch ei so Pumpi liede.

Du häsch jo selber garantiert

vom Pumpi-Bonus profitiert.

à propos Regierungswahlen

s’Tagblatt frogt de Herbert Huser:

«Säged Sie: Wiä schriebt me ‚Loser‘?»

America – great again

Viel besser isch me do halt dra,

als Wähler i de USA.

I am a fan and I will jump:

«We have no Blocher, we have Trump.»

Nachsatz

Am beste wör me beidi Gselle

zur Abschreckig a d’Grenze stelle.

Mit somene Panoptikum

kehred d’Flüchtling selber um.

Rücktrittswelle

De Müller goht, de Brunner au.

De Darbellay seit endlich tschau.

Jetzt müesstisch nu no du, min Alte,

au viellicht e bitzli schalte.

Denn bliebt vo üs zwei Lästerzunge

de Gschieder und säb isch en Junge.

Replik Vater:

Da wör no fehle, so im Ganze:

Wer luegt denn sus uf d’Staatsfinanze?

För’s Geld und so, da lüüchtet ii,

do bruucht’s kei Mami, do bruucht’s mi.

Duplik Sohn:

Doch de Kanton wär besser dra,

hett döt au s’Mami d’Hose aa.

Schweizer des Jahres

Wählt d’Schwiiz de Polo, frog i Sie:

Isch d’Schwiiz oder de Polo uf Extasy?

Lästervers:

Sin Hashtag schriebt er schnell uf Twitter:

«Mini Hasch-Täg mach i wiiter.»

Badeplausch

De Martin Klöti macht gern Sport, am liäbste z’Horn am See.

Er schwimmt, trainiert, isch body-gstählt, da mue me eifach gseh,

Er crawlt und krüzt döt z’mittst im See de guete Albert Nufer.

Do frogt ehn dä: «Komm, Klöti, säg, schwimmschs du a s’ander Ufer?»

CVP-Heiratsstrafe

De Papst träumt z’Rom im Mittagsschlof:

«Wa söll da mit de Hürotsstrof?»

Denn wacht er uuf und frogt no schlau:

«Wa nützt mi da? I ha kei Frau?»

De Klöti frogt sich s’Gliiche au.

Ungeschliffener Diamant

Isch de Christoph nüme tätig

chonnt d’Martullo hochkarätig.

Zum Brillant cha diä nöd riife;

so lang chasch gar kein Rohling schliife.

atemlos

I schlof ganz tüüf und fest im Nescht,

bis d’Frau mer plötzlich d’Kappe wäscht:

«Du träumsch fast wiä e Ständerlampe

vo dere Helen Fischer Schlampe.

Du bisch för diä jo drümol z’alt.

Jetzt gohsch i s’Bad und duschisch kalt.»

Jetzt isch wieder alls im Lot:

Sit em Tatort isch diä tot.

FIFA

Tuet am Blatter alles weh, hät Schmerze und Arthrose,

goht er zum Arzt und macht en Check und hät denn d’Diagnose.

Er mue jetzt Dolo forte neh und kräftig iimassiere

mit gnueg Crème, da isch nöd schwer, er isch jo güebt im Schmiere.

Grossmufti

De Emir chonnt im Flüüger aa, da mue sich jo rentiere.

Er loht in Genf vom Doktor No de Hallux operiere.

Zur gliicher Zyt loht sich en Arzt vom Emir schnell befuuge,

de Fatima grad nebed dra e bitzli Fett abzsuuge.

De Emir seit: «Da bringt doch nüt, da fang i gar nöd aa,

I de Burka gsehsch de Fatima da Fett jo gar nöd aa.»

Lästervers

Packt de Emir d’Burka uus, gseht er sini Diva.

Wa hend diä dere operiert, diä gliicht jo em Mike Shiva.

Liäbe Emir, selber z’schold, isch diä nöd noch dim Gschmack.

Es weiss doch jede Tubel do: Me kauft kei Katz im Sack.

Residenza Signore

Hüllt sich z’Rom im Altersheim e altverschrumpflets Wybli

molto lento Schiib- um Schiibli uus em Kleid samt Liibli,

und seit diä Zweit, wo’s Hüübli treit: «Dir fehlt jo wohl e Schrüübli»,

und isch diä Dritt au schüüli fit und git sich drom e Schüübli,

und stönd diä drü mit Schlotter-Chnü ganz plötzlich oben ohni,

denn sind’s vereint im Altersheim vom Silvio Berlusconi.

Pornostar

De Kim Jong-Un chonnt uf Livorno

und luegt im Kino döt en Porno.

Im Film do blöfft de Roc Siffredi:

«I bi en Hengscht und mi wött jedi!»

Do seit de Kim: «Hör uuf pamphlete,                

Du weisch, i ha diä grösst Rakete.»

Wahljahr

Mer Schwiizer sind scho weisch wiä bieder.

Diä letschte Wahle zeiged’s wieder.

De einzig Troscht isch do für mi:

De Mörgeli isch nüm debi.

Sommermärli

De Kaiser Franz, da muess so si,

chonnt im Knast uf Bsuech verbi.

De Ulli Hoeness klatscht Applaus:

«Ich bin ein ein Star, lass mich hier raus.»

Frauenquote

Mer zwei sind au för d’Frauequote

und müehed üs drom au noch Note,

dass mer bald paritätisch sind.

Doch goht üs eifach nöd in Grind,

wer denn för üs zwei so beflüglet,

kocht und wäscht und putzt und büglet.

Tschüss

Mer zwei mit nünzgi, frogt dä mi chli bieder:

«Has leider vergesse, wiä heissisch scho wieder?»

«Macht nüt, liäbe Fründ, chomm mach dir kei Gwösse.

Doch säg mer no schnell: Bis wenn muesch es wösse?»

Schluss:

Wör niemert meh z’Sangalle wohne,

denn müesst me d’Lästerzunge klone.

Denn wär am Schluss no er und i,

so schö chönnt’s do z’Sangalle si.

In eigener Sache

Zwanzg Johr lang han i gwürgt und klopft

und min Kolleg i s’Gwändli gstopft.

Doch da Johr hät’s, es isch vertrackt,

am Gwändli alli Nöht verjagt.

Jo nu denn halt, es isch e so,

drom han i jetzt en Neue gno.

Geistig liit er grad no dine

und goht zum Glück is Gwändli ine.

Replik

I säg bescheide do dezue:

s’Gwicht goht abe, s’Niveau ue.

Top Secret

Gell, Kolleg, s’isch scho horrend,

wa mer för e Regierig hend.

Diä hebed dicht und sind verschwiege.

Nu lönds halt mengmol d’Akte liege.

«Liege loh», wiä’s nu scho tönt;

a s’Liege sind sich diä jo gwöhnt.

Login

Wötsch e sichers Passwort ha,

denn meldsch di mit dim Foti a.

Diä meiste nimmed eis vom Grind,

will’s nöd de Geri Müller sind.

Dä hät weg sine Sommersprosse

s’Foti wiiter one gschosse.

Viellicht hät er sich denkt debi:

s’chönnt schöner als de Zingge si.

Heiliger Stuhl

De Bischof Markus, dä vom Dom,

ghört vom Papst, sim Chef, i Rom,

de Klerus seg, Halleeeluja,

schlimmer fast als Mafia.

De Bischof seit: «Stimmt haargenau:

D’Mafia git’s im Thurgau au:

Dominus vobis cum;

da isch nöd mis Bistum.»

De Bischof Huonder wör entgegne:

«Solang’s nöd schwul sind, chasch es segne.»

Knock-out

Kum hät en SVP-ler arg bedeppt,

e Grüeni z’Zug is Nest abgschleppt,

do wött de Brunner subito

gern mit em Freisinn zemä go.

Do hend sich grad diä Rechte troffe:

De Toni hät diä Tropfe gsoffe.

Modotti Nacktplakat

Kum isch da blutt Plakat döt ghanget,

hät’s am Thomas Scheitlin glanget.

Zu de Frau Adam seit er stiif:

«D’Sangaller sind för da nöd riif.»

Sie seit: «Momoll» und als Bewiis

verwiest sie ehn as Paradies.

Döt sind’s au blutt; sie weiss da gnau.

Sie isch am Adam sini Frau.

Altpapier

D’Stadt Sangalle wird all schönner,

deför wird s’Tagblatt immer dönner:

Nu Leserbrief und Truurazeige

und personell en Ringelreige.

Jetzt seit min Huuswart, gar nöd blöd:

«Diä Zytig z’bündle, lohnt sich nöd.»

Drom rüehrt er jetzt bi üs im Block

de Scheiss direkt in Robidog.

FIFA

D’Wiederwahl, diä lauft doch rund.

De Blatter isch luut Doktor gsund.

s’Herz isch guet, i wör’s no globe,

doch sis Problem hockt wiiter obe.

Lästerregel

Seit de Doktor zum Patient:

«Dis Hirni tuet nu zeh Prozent»,

denn seit de Blatter ganz banal:

«Da langt für mini Wiederwahl.»

Rücktritt

De Pierin Vincenz nimmt de Huet.

De Boris Becker finds no guet.

Um d’Nochfolg isch er voll debi.

Er wött au Bank-Direktor si,

am liäbste vo de Samebank.

Als Tresor gnüegt en Beseschrank.

Brüssel

D’Simonetta, d’Doris, d’Eveline

sind alli chli EU-affin.

Diä gind sich d’Klinke anenand

vom Jean-Claude Juncker grad i d’Hand.

Und jedi schwärmt vom Super-Ma,

will dä so sauguet küsse cha.

Mann und Frau

Gilt „gleicher Lohn für gleiche Leischtung“

auch für Männer ohne Eisprung?

Mini Frau seit: «Muesch nöd rüssle.

Du häsch de Sprung halt i de Schüssle.»

Schuldenschnitt

z’Griecheland herrscht Katzejammer:

Alles mösi undern Hammer.

Kei Pardon kennt d’Angela.

Do mue me fascht scho Mitleid ha.

«Herr Tsipras, du bisch nöd ällei;

i folge au de Frau dehei.»

Doppel-Namen

De Ueli nimmt bim Christof Platz

und stellt e Frog: «Kennsch d’Widmer-Schatz?»

«Dumme Chaib, häsch hüt de Mumpf?

Sicher kenn i d’Meier-Schlumpf.»

Bischöfliches

De Pfarrer z’Bürgle hät, kei Wonder,

en Riesezoff nu weg dem Huonder.

Statt Lesbe oder Protestante,

segnet dä nu Ministrante.

Tschüss

Da isch es gsi, de Aafang isch gmacht:

De erst Uftritt för mi und ehr hend jo glacht.

Drom wör i eu säge, da isch zwor no vag:

Chomm nächst Johr denn wieder, falls dä do no mag.

Pipifurz

Gsehsch ein im Zug, wo bitzli gstresst,

d’Füdlibacke zemä presst

und küücht und schnuuft im Vierteltakt,

als ob’s ehn jetzt denn grad verjagt:

Denn seisch zum Trost dim liäbe Gspänli:

«Du hocksch im Appezeller-Bähnli.»

Im Himmel

De Zeus im Himmel seit zum Schatz:

«Chomm, Hera, mach e bitzli Platz

för en Bischof, s’isch en Schrott,

wo tuet und meint, er seg scho Gott.»

D’Hera goht und frogt denn nur:

«Chonnt dä vo Limburg oder Chur?»

Initiative 1:12

De Berlusconi, s’isch kein Witz,

Chämt liäbend gern zu üs i d’Schwyz.

För ehn als Bunga-Bunga Pro-Aktive

wär eis zu zwölf e Perspektive.

Nachsatz

De Toni schriebt ehm uf Milano:

«Silvio, Silvio, ganz piano.

Du chasch scho cho, au füdli-blutt;

i bsorg dir s’Saisonnier-Statut.»

Und morn liit scho sin Pass parat

z’Sangalle uf em Konsulat.

Sau-Ausländer

De Ueli seit am Hansli schnöd:

«Sau-Usländer seit me nöd.»

«Sicher scho, da isch erlaubt.

Herr Bundesrot, und öberhaupt,

Sie mönd sich do jo gar nöd rüehre,

denn wör mi so en Typ entfüehre,

so wöred Sie sich jo nöd rhode,

und d’Luftabwehr, diä bliebt am Bode.»

För ‚Sau-Entfüehrer‘ und Bandite

do gelted strikti Bürozyte.

Handy

Chonnsch vom WC, bisch nervös,

häsch nassi Füess und nassi Stöss,

denn weiss i grad, wa da bedütet:

Bim Schiffe hät dis Handy glütet.

De Prinz Charles, wiä’s halt so lauft,

hät sich e chlieses Handy kauft.

Doch leider hät’s de Dienst verseit,

es isch ehm grad dör d’Ohre gheit.

D’Frau Merkel hätt’s vor Wuet verjagt:

«De Barack hät mis Handy knackt.»

«Angie-Baby, don’t feel bad, i ha dir’s not verüblet,

wo mer dis Photi gstreamed hend, hemmer’s sofort küblet.»

Mitgefühl

De Schneider-Ammann seit betroffe:

«Gell, Alice Schwarzer, isch domm gloffe …»

Sie git ehm zrogg: «Jawohl, leider,

ist nur der Johann aus dem Schneider …»

Ästhet

De Martin Klöti gseht guet us und isch au en Ästhet,

cha koche, bügle, esst au gern, wa me gar nöd gseht.

Er isch modern und hät Kultur und gfallt drom minre Frau.

För eimol isch da nöd so schlimm: De Manne gfallt er au.

Lästerspruch

Nu z’Russland, ha mer säge loh,

sölled’s meh uf Wodka stoh.

Wersch döt verhaftet und lauft’s fuul,

denn bisch vo Greenpeace oder …. cool.

Lifestyle

De Mörgeli, s’isch allerhand,

goht in Spitol mit Sonnebrand.

s’Gsicht verbrennt, wa wötsch do mache?

Dem seit me Burnout – nöd ganz bache.

Mindestlohn

Weg Sotschi hend’s, mer schiint’s verkehrt,

de Regierigsröt de Compi gsperrt.

Und ohni PC, s’dörf nöd si,

schlofed diä im Büro ii.

Zum Glück git’s döt Bewegigsmelder:

Wer z’erst verwacht, schriebt Sitzigsgelder.

angesäuselt

Chonnt er spot hei und stiegt onder Decki,

frogt sie ehn scharf, worum er sie wecki.

«Weisch, liäbe Schatz, du chonnsch sicher druuf,

mit „S“ fangt s’Wort a und mit „x“ hört’s denn uuf.»

Sie luegt ehn gross a: «Da muesch mer verzelle,

worom söll i z’Nacht no Spitex go bstelle?»

Asterix bei den Helvetern

De Barroso vo Brüssel hät innerlich knickt

en Meldeläufer zum Cäsar uf Rom abe gschickt:

«Wa machsch weg de Gallier e choge Gezeter?

Mer hend au Gallier, nu heissed’s Helveter.

Und s’schlimmst am ganze Null und nix:

De Blocher isch de Troubadix.»

Millieu

En Tschugger vo Zöri, hät me üs gseit,

hät i de Sexbox paar Hübschi flach gleit.

Vor Gricht hät er gmeint, es heg ehm scho gfalle,

nu täg er us Prinzip för s’Liegge niä zahle.

De Valentin Landmann verteidigt ehn so:

«Im ‚Horizontalgwerb‘ chasch flach use cho.»

NSA-Affäre

Dütschland isch total empört:

De Barack chlaut, wa Dütschland ghört.

Ein deutscher Knabe fragt Obama:

«Mein Vater sagt, dies sei ein Drama.»

Obama sagt: «Mach kein Theater.

Er ist in Wahrheit nicht dein Vater.»

Tschüss

Da isch gsi, noch zwanzg Johr und meh,

hät’s de Gschieder vo üüs beide gseh.

Da isch hüt min letschte Vers.

Danke, schö gsi, tschüss. Da wär’s!

Abzocker (2013)

De Lohn bi de KB, wa isch scho debi,

söll höchstens s’Dopplet vom Regierigslohn si.

Zom CEO, wo flueched, seit de Gehrer bequem:

«Erhöched min Lohn, da löst eu s’Problem.»

Lästerhafter Nachsatz

Da wör grad no fehle, i frog mir, för wa,

söll dä öberhaupt e Beförderig ha.

Dä hät scho gnueg Lohn und wenn i so denk,

hend mer mit dem jo sowieso s’Gschenk.

Frauenquote (2013)

Im Unterschied zu de grosse UEFA

hät de Stadtrot jetzt hät wieder e Eva.

Diä Eva heisst Adam und hät e chli gschwolle

am Buschor de Öpfel vom Bau(m) abe gstohle.

Gallus (2012)

Jetzt seit doch ein, wa fallt dem ii,

dä Gallus seg Elsässer gsi.

Da wär, wiä wenn de Blocher lallt,

er seg i d’Widmer-Schlumpf verknallt.

Windfahne (2011)

z’Rorschach hät’s e Fahnestange.

Döt gsehsch e Schwiizer-Fahne hange.

Am Thomas Müller git’s fast d’Krise:

Nu laui Lüftli und kei Bise.

Jetzt suecht er halt, wa wötsch no meh,

s’Luftloch bi de SVP.

Call Center (2011)

Letschti lütet s’Telefon und de Merz nimmt ab.

Es meldet sich e netti Stimm und diä froget knapp:

«Gind Sie, Herr Merz, alt Bundesrot, da wär denn scho de Clou?

Zum Bischof do, im Bistum Chur, e kurzes Interview?» –

«Jo sicher nöd, da lohn i sii, do dröber wachst jetzt Gras.

I ha nu ghört, de Huonder seg no schlimmer als de Haas.

Und öberhaupt, i frog di jetzt, wa du jo sicher weisch,

isch dä so dick und chonnt sin Buuch vom viele Bü … Bü … Bündnerfleisch.»

www (2010)

Wenn i a d’Regierig denk,

jo guet Nacht, denn hemmer s’Gschenk:

Statt www heisst’s hhh:

Hilber, Haag und Hanselma –.

kkk tönt au nöd heller

för Karin, Kölli und de Keller.

Doch s’schlimmst stoht för de Stüür-Verzehrer:

ggg för «Geld gibt Gehrer!»

Bunga Bunga (2010)

Seit d’Tabea ohni BH zu dä Lea:

«Gsehsch, au d’Bea stoht im BH neb dä Thea.»

Und isch au d’Vroni obe ohni neb de Loni,

denn isch da Pressekonferenz vom Berlusconi.

Jo guet Nacht (2009)

Wenn i a d’Regierig denk,

jo, guet Nacht, denn hemmer s’Gschenk:

Do wäred erstens mol drü Fraue,

denn drü Manne und en Schlaue.

– Ehr glaubed wohl as Teddy-Bärli?

Säb vom Schlaue isch e Märli.

Lästerregel

Hend’s achzg Millione fast verloched,

isch es klar, dass d’Volksseel koched.

Und git’s denn glich no bitzli Rubel,

freut sich de Gehrer wiä en Tubel.

Mon Chérie (2008)

De Double U, da mue so si,

trefft de Monsieur Sarkozy.

«Salue, Georges des Etats-Unis,

je vous présente ma Carla Bruni.

Regarde die Body – und de Buse –

chasch drü Woche nüme pfuuse!»

– Seit d’Madame Bush zum Sarkozy:

«Guet för Sie, min schloft all ii!»

Schwarzes Schaf (2008)

De Ueli hät en Geissbock kauft,

de Blocher hät ehn Zottel tauft.

Jetzt hät de Brunner, Gott sei Dank,

för d’Fasnacht au e Schnitzelbank,

und rüeft denn uus: «Uf s’Wörtli Zottel,

reimt sich nüt – bin i en … (Toni).»

A-Probe (2008)

D’Martina Hingis, cha passiere,

muess d’Weisheitszäh go operiere.

De Zahnarzt meint, chum luegt er ine:

«Weisheitszäh hät’s do kei dine!»

Sie wött trotzdem e Sprütze ha,

uf eini meh chäms nöd drufa.

Tel. 111 (2007)

«Jo, grüezi, Fräulein, ha vergesse,

hend Sie vom Stöckling en Adresse?»

«I mue schnell luege, ein Moment,

ob mer so alti Date hend.

Sie globed’s nöd, wa do no stoht:

Dä seg no all Regierigsrot!

I hoff, diä Uskunft macht kei Ärger.»

«Nei! Danke vielmol, Schöneberger!»

Swiss (2007)

Lauft s’Strofverfahre weg de Swiss,

hend diä Type alli Schiss.

Statt rede ghörsch diä Herre lache:

«Weisch, mer wönd kei Fystaub mache!»

Buure-Radio (2006)

Hockt de Buur z’lang am Computer,

liidet d’Küeh am volle Uter.

Singed d’Küeh holladio,

lauft im Stall e Radio.

Het jedi Kueh för d’Wahl e Stimm,

wär’s för de Toni Brunner schlimm.

Weisch, wiä wör’s de Toni strähle,

wör sini Kueh no SP wähle!

5 statt 7 (2005)

D’Regierig seit usgrechnet jetzt,

si seg mit siebe bestens bsetzt.

D’SVP isch sich do schlüssig:

«Sind alli links und öberflüssig.»

Ohni diä (siebe) Linke, wör i wette,

bliebt nu de Gehrer, und dä isch en Nette.

St.Galler Deputation (2004)

Irgendwiä isch da en Hohn:

Sangalle en Agrarkanton.

I ha mit dene z’Bern Beduure:

Mer schicked d’Pia und föf Buure.

Und s’Sahnehübli uf em Butter

isch e luuti Jasmin Hutter!

Es hutteret (2004)

D’Feldbusch und d’Hutter hend beidi e Röhre;

diä Einti isch hübsch, diä Ander e Göre.

Diä Eint macht’s bewusst und stellt sich nu blöd.

Welli das wer isch, säg i doch nöd!

Vogelgrippe (2004)

Frisst wer vom China-Huhn die Strippe,

gibt’s, wer weiss, die Vogelgrippe.

Geht einer mit ’nem Huhn ins Nest,

kriegt er wohl kaum die Hühnerpest.

Bist du ein Vogel, er ein Stripper,

heisst das Virus: Vogel-Tripper!

Bleibt die Spucke weg (2003)

s’Bundesgricht suecht jetzt im Fall

e Huus z’Sangalle und en Stall,

a bester Lag, mit Panorama,

för zwanzg Richter und e Lama!

Windfahne (2002)

Geht Güntzel von der FDP

ein bisschen rechts zur SVP,

denn isch bi beide ganz gediege,

s’Niveau klar noch obe gstiege.

Lange – kurz gedacht (2002)

Hät im OP de Lange chli lang operiert,

Skandal för d’Frau Kessler, sie hät kurz sinniert.

Viellicht söt de Lange chli kürzer operiere,

aber sicher söt d’Kessler chli länger studiere!

Handy (2001)

Chonnsch vom WC, bisch nervös,

häsch nassi Schueh und nassi Stööss,

denn weiss i grad, wa da bedütet:

Bim Schiffe hät dis Handy glütet.

Kult(ur)güterschutz (2001)

Wa üs de Zorn im Hirni staued:

D’Zürcher hend üs d’Schrifte klaued.

Es isch doch scho zum Tüfel hole:

De Christen hetteds scho nöd gstohle.

Debi isch dä au insgesamt

sit de Villmerger Krieg im Amt.

Lästerregel

Tritt Estermann in Zürich kurz,

ist es uns St. Gallern schnurz.

Ist Christens Rückritt all noch offen,

so bleibt uns immerhin das Hoffen …

Ab ins Altersheim (2000)

De BLICK verrotet streng geheim:

De Mäni goht is Altersheim.

Döt trefft er luuter netti Lüt

und hofft uf dopplet oder nüt!

Er glaubt, er trefft i dere Schwetti

au no d’Nella Martinetti.

Denn chönnt er live im Fernseh schmuse,

versinke ime volle Buse

und dörfti hoffe, wör i globe,

er wär bim Gfätterle denn obe.

Expo (1999)

Mer Schwizer befürchtet för d’Expo en Flop.

Triebed mer wieder en Nonsens nonstop.

Gsehsch da Konzept vo de Frau Pippilotti,

bisch wieder zfrede mit em Flavio Cotti.

Weltuntergang (1999)

D’Uriella, sie warnt: «Im 2000 und zwo

wird d’Welt und d’Erde under go.»

De Ogi fleht: «Noch einmal Gnade,

im 2000 und sechs ist Olympiade.»

Es schneielet, es beielet (1999)

Es schneielet, es beielet, es goht en küehle Wind,

de Stadtamma stoht z’Lech im Schnee, es pfieft ehm um de Grind!

Es schneielet, es beielet, es isch e Sauerei,

de Christen hät kei Langlaufski, jetz chan er nüme hei.

Es schneielet, es beielet, z’Sangalle isch me froh,

de Heinz fruschtriert, will niemert rüeft: Er söll doch wieder cho!

Unter der Bettdecke (1998)

De Hillary hät’s schinbar gfalle

uf em Säntis und z’Sangalle.

Als Gschenkli git’s kein Blumetopf,

nei, es Nastuech, mit em Knopf.

S’wär guet de Bill, de choge Simpel,

het uswärts au en Knopf im …. (Pimpel)!

Volkstribun (1998)

De Ogi bewiist, wa d’Schwizer jo wönd,

dass nöd bloss diä Gschiede e Chance hend.

Eine mögt’s liide mit wenig Profil,

doch siebe vo dene sind irgendwiä z’viel!

Aus dem Bundesrat (1997)

Delamuraz, Delamuraz,

wötsch au e Schlückli Féchy ha?

Mais non, mon cher, René Felbèr

süft alli Féchy scho selbèr!

Gold – Silber – Bronze (1997)

De Hoppe rüeft am Götschi:

«I ha ne Kufe, wötsch si?»

«Nei, diä hät zviel Teili,

nimm lieber diä vom Meili.»

Diä schiint mer monotoner,

sus nimm i diä vom Rohner!

D’Medaille weg, en Bschiss, Protest,

för üs stönd Dütschi ufs Podest.

A dem sind nume d’Banke z’schold.

Nähmsch du als Schwizer hüt no Gold?

Stop it Tennis (1996)

D’Steffi spielt Tennis, de Ufschlag enorm;

sie gwünnt jedes Game, isch super in Form.

Wär sie de Rosset, gäb’s weniger Jubel,

daför wär de Vater kein söttige Tubel!

Geld – zählt (1995)

Ebner und Senn;

SBG – und denn?

KB, isch (S)schad –

fertig: Sparad!

Blauhelme (1994)

Blauhelm-Iisatz mit de Schwizer Armee,

wött i, wenn’s goht, liäber nöd gseh.

Somalia verlangt sus, und macht au Rabatz,

för jedi Blessur hundert Kamel als Schadenersatz!

Diä Forderig gäbt, erklärt de Stich Otti,

en personelle Engpass im Departement Cotti!

Sprachrohr Gottes (1993)

D’Uriella vo Gonte, diä hät doch en Tick;

de Geist wött sie heile mit folgendem Trick:

A Badwanne bruchsch, Wasser, wo lauft,

drü Finger zum rühre und en Domme, wo’s kauft.

Tel. 156 (1992)

För d’PTT, do bringt da Laster,

wenig Gfohre, aber Zaster.

Stecksch de Hörer i nen Gummi,

git’s kei Aids und Zyt isch ummi …

Ötzi (1992)

Isch de Ötzi Italiener?

Groschli isch er, glob i ehner.

Vor tusig Johr isch er verschwunde

und s’Hirni hend’s bis hüt nöd gfunde.

Ganz ähnlich isch’s bim Bischof z’Chur:

Döt findsch vo Geist au nu e Spur!